Dar e Nabi Par Pohanch Gaya Hun

درِ نبی پر پہنچ گیا ہوں یقین حاوی سا ہے گماں پر زمین پر ہوں کہ آسماں پر میں ہوں نہیں ہوں جو ہوں تو کیا ہوں درِ نبی پر پہنچ گیا ہوں

نہ رنگ نام و نمود میرا نہ سایہ ہست و بود میرا خنک خنک نور مصطفیٰ ہے پگھل رہا ہے وجود میرا جمال سرکار ضوفشاں ہے نگاہ میں درمیاں کہاں ہے سراپا آنکھیں بنا ہوا ہوں درِ نبی پر پہنچ گیا ہوں

یہ دید معراج ہے نظر کی یہی کمائی ہے عمر بھر کی رئیس لیل و نہار ٹہرا طلب ہو کیا مجھ کو مال و زر کی شعور عرفان و آگہی سے خزانہ جلوۂ نبی سے تجوریوں کی طرح بھرا ہوں درِ نبی پر پہنچ گیا ہوں

حیات کو جس کی دُھن رہی ہے وہ قرب کے پھول چُن رہی ہے سلام کا بھی جواب گویا سماعت عشق سُن رہی ہے اب اور کیا مانگنا ہے رب سے کہ ہاتھ باندھے ہوئے ادب سے حضور کے سامنے کھڑا ہوں درِ نبی پر پہنچ گیا ہوں

یہ روضۂ شاہِ انبیاء ہے کہ کرسی و عرشِ کبریا ہے بندھا ہے درباریوں کا تانتا عجیب اندازِ تخلیہ ہے بغیر اجازت ہو باریابی سیاہی دل ہو آفتابی میں زنگ خوردہ چمک اٹھا ہوں درِ نبی پر پہنچ گیا ہوں