Aao Ik Baar Phir Makkay Ki

Aao ik baar phir Makkah ki pur-noor fazaon mein chalein Jab buq’at-e-noor bana tha sara aalam, Yazdan ki in ataon mein chalein

Phir chashm-e-tasawwur mein layein ik baar woh manzar-e-wiladat-e-Aqa ﷺ sahib Qudsiyon ke pehray aur hooron ke jhurmut mein, noor ki chaon mein chalein

Baad-e-naseem ki atkheliyan dekhein, aaftab-o-maah-e-taab ki be-chaini dekhein Phaili hai chaar su bu-bas-e-chaman, muzayyan theen no-rang se jo un raahon mein chalein

Gulshan-e-Habib ke sabhi pankh pakheru jalwa-e-noor par thay kabhi midhat-sara Aao ik baar phir khush-bakht parindon ki chahchahaon mein chalein

Tauqeer-e-Amina mein farsh ta arsh farishton ne taan di thi noor ki chadar Aao ik baar phir tasawwur mein phaili hui noor ki banhon mein chalein

Tuloo-e-fajr-e-imaan kya hui ke toot gaye Kisra ke mehalat ke minaray sabhi Aao ik baar phir se Aqa ﷺ ke Makkah ki gum-gashta mutahhar fazaon mein chalein

Namaz-e-panj-gana toh sabhi khuzoo parhte hain rozana sain Jo namaz-e-ishq aur ibadat-e-deedar reh gayi hai sahwan, aao qazaon mein chalein

More Lyrics, Less Storage - Install the App and Ditch the Screenshots!

Wali-e-Batha ki aamad thi ke khushbu-e-Jannat se mehak uthay dar-o-baam sabhi Aao ik baar phir se Batha ki ambar-ageen hawaon mein chalein

Andheray chat gaye saaray, bujh gaya aatish-kadah-e-Fars, zoo-fishani hogi Shafqat Aao ik baar phir se mashoor mausam ki mast adaon mein chalein