Haq Taala Ki Tasbeeh

حق تعالیٰ کی تسبیح کرتے رہو اُس سے ڈرتے رہو

ذہن میں اُس کے احکام رہتے ہیں ذکر چلتا رہے اشک بہتے رہیں ھیگتی روشنی میں نِکھرتے رہو اُس سے ڈرتے رہو

بندگی کا حقیقت کا ایمان کا معرفت کا شریعت کا قرآن کا اپنی تصویر میں رنگ بھرتے رہو اُس سے ڈرتے رہو

جزوِ جاں کو اگر گُل کی ہے جستجو ساحلِ رُوح کی ہے اگر آرزو اپنی گہرائیوں میں اُترتے رہو اُس سے ڈرتے رہو

رنگ ہی رنگ آنکھوں میں گھُل جائیں گے رازِ ارض و سما تم پہ کُھل جائیں گے کُوچہء عشق میں پاؤں دھرتے رہو اُس سے ڈرتے رہو

تابہ کے ساتھ دیں گی حسیں خواہشیں صِرف دُنیا کی خاطر یہ آرائشیں آخرت کے لیے بھی سنّورتے رہو اُس سے ڈرتے رہو

لمحہ لمحہ کرے گا تمھیں یاد بھی زندگی پاؤ گے موت کے بعد بھی اُس پہ مٹتے رہو اُس پہ مرتے رہو اُس سے ڈرتے رہو

ناز اُس پر اگر ہے مظفؔر تمہیں اُس کی رحمت سمیٹے گی بڑھ کر تمھیں ٹُوٹ کر اپنے اندر بکھرتے رہو اُس سے ڈرتے رہو