Tarany Mustafa Ke Jhoom Kar

تَرانے مصطَفٰے کے جھوم کر پڑھتا ہُوا نکلے یُوں حج کو’’ چل مدینہ‘‘ کا وطن سے قافِلہ نکلے

نظر جب سبز گنبد پر پڑے غَش کھاکے گِر جاؤں تِرے قدموں میں جانِ مُضطَرِب یامصطَفٰے نکلے

اگر مِیزاں پہ پَیشی ہوگئی تو ہائے! بربادی! گُناہوں کے سِواکیا میر ے نامے میں بھلا نکلے

کرم سے اُس گھڑی سرکار !پردہ آپ رکھ لینا سرِمَحشر مِرے عیبوں کا جس دم تذکِرہ نکلے

نظر آئیں جُوں ہی سرکار مَحشرمیں مِرے لب سے یہ نعرہ یارسولَ اللہ کا بے ساختہ نکلے

اگرچِہ دولتِ دنیا مِری سب چھین لی جائے مرے دِل سے نہ ہرگز یانبی تیری وِلا نِکلے

پڑوسی خُلد میں یارَب بنادے اپنے پیارے کا یِہی ہے آرزو میری یِہی دِل سے دعا نکلے

تجھے ہرگز گوارا ہو نہیں سکتا کہ مَحشر میں جہنَّم کی طرف روتا ہوا تیرا گدا نکلے

Download Lyrics & Access Offline - Install Our App Now!

رسولِ پاک سے میرا سلامِ شوق کہہ دینا قریبِ گنبدِ خَضرا تُو جب بادِ صبا نکلے

تَلاطُم خیز موجیں ہیں تھپیڑوں پر تھپیڑے ہیں مِری نیّا بھنور سے اب سلامت ناخُدا نکلے

الٰہی موت آئے گنبدِ خَضرا کے سائے میں مدینے میں جنازہ دھوم سے عطارؔ کا نکلے