Na Mein Baaghi Hun

نہ میں باغی ہوں نہ منکر نہ نکوکاروں میں نام لیوا ہوں ترا تیرے گنہگاروں میں

سر رگڑتے ہیں سلاطینِ زمانہ آکر دَبدبہ ایسا نہ دیکھا کہیں دَرباروں میں

ان کا بندہ جو بنا ہوگیا آزاد وہی ان سے جو کوئی پھرا وہ ہے گرفتاروں میں

ان کا بندہ جو ہوا خلد ہے اس کی خواہاں ان کے دشمن ہیں جہنم کے سزاواروں میں

آج جو چاہیں کہیں پیروِ نجدیِ لَعِیں کل کو کھل جائے گا اُٹھیں گے جو مکاروں میں

شرم کر مہرِ قیامت مجھے آنکھیں نہ دِکھا ان کو دیکھا ہے میں ہوں جن کے گنہگاروں میں

آنکھ تو کھول کے دیکھو ِنگہِ ِایماں سے شانِ و الشمس نظر آتی ہے رُ خساروں میں

خوبیِ بخت سے ہوجائے زِیارت جو نصیب نام لکھ جائے مرا آپ کے زَوَّاروں میں

آپ کے صدقے میں اے رُوحِ جناں جانِ چمن خرمن گل ہی نظر آتے ہیں اَنگاروں میں

اِک نبوت تو نہیں باقی ہیں جتنے اَوصاف جمع ہیں اے شہِ لولاک تیرے یاروں میں

بے طلب اپنے بھکاری کی بھرے جو جھولی ایسی سرکار بتادے کوئی سرکاروں میں

ہاتھ اُٹھا کر مرے داتا مجھے ٹکڑا دے دو اے کریم عربی میں بھی ہوں حقداروں میں

کوہِ غم کاہ نہ کیوں کر ہو جمیلؔ رضوی رحمتِ شاہِ عرب جب ہے گنہگاروں میں