Banda Karay Sana Shah e Aali Waqar Ki

Banda kare sana Shah-e-aali waqar ki Goya barabari hai yeh Parwardigar ki

Bandon ke sath aap hai shamil durood mein Had ho gayi hai aap ﷺ se be-had ke pyar ki

Pahunche thay Koh-e-Toor pe khud Hazrat-e-Kaleem ؑ Saj dhaj hai Arsh-e-Haq pe tere intezar ki

Har tajdar aap ﷺ ke dar ka faqir hai Konain mein hai dhoom mere tajdar ki

Jab tak na ho tumhara karam baat kyun bane Aaye qarar dil ko, suno be-qarar ki

Khole Nabi ﷺ ne gesu-e-Wallail jab kabhi Rut aa gayi ik aan mein abr-e-bahar ki

Instant Access to Thousands of Lyrics - Tap to Install!

Murda hai woh ke aap se ulfat nahi jise Zinda hai, jaan aap ﷺ pe jisne nisar ki

Har roz tere gesu-o-aariz ka hai tawaf Gardish nahi zamane mein lail-o-nahar ki

Kis se kahoon fasana-e-gham aap ke siwa Kis ko khabar hai aur mere haal-e-zaar ki

Tukre kiya qamar kabhi palataya aftab Allah re yeh shaan tere ikhtiyar ki

Poochay gi aasiyon ko shafa'at Huzoor ﷺ ki Zahid ki hai yeh baat na parhezgar ki

Ae Jaam-e-hub-e-Sarwar-e-Konain zinda bad Mere paidar-e-zeest mere paidar ki

Sajid jo mere dil mein hai ishq-e-Nabi ﷺ ka dagh Ki naqal chand ne bhi dil-e-daghdar ki