Ya Haji Waris Ali Piya

یا حاجی وارث علی پیا مری جنت تیری گلی پیا

ترا عشق ہے دستر خوان مرا ترے ٹکڑوں پر میں پلی پیا

مرےاندر بھڑکے آگ تری مرا شعلہ تیری کلی پیا

باندھی ہے تیری آہٹ سے تو سانس ٹھمک کر چلی پیا

تری خاکِ قدم بھی ایسی ہے جیسے مصری کی ڈلی پیا

جو شمعِ محبت ہاتھ میں تھی نس نس کے اندر جلی پیا

ترے خادم کے بھی خادم کا مرا رُواں رُواں اردلی پیا

ترے زانو پر ہے سر میرا مری قسمت کتنی بھلی پیا

مری عقل بھی ہے منھ زور بہت مری وحشت بھی منچلی پیا

تھمتے ہی نہیں آنسو میرے میں کتنی پھولی پھلی پیا

ترے نقش قدم پر قدم رکھوں ترے علی پیا مرے علی پیا

ترے ہاتھ پہ ہاتھ ہیں لاکھوں کے تو ولیوں کا ہے ولی پیا