Meri Nazar Mere Dil

مری نظر مرے دل میری جاں کا مالک تو مرے سکوت کا میرے بیاں کا مالک تو

مجھے تو لمحہ آئندہ کا بھی علم نہیں نشاں کی تجھ کو خبرٗ بے نشاں کا مالک تو

قدم قدم تری تو فیقٗ رہ نما میری رہِ یقیں سے گزرتے گماں کا مالک تو

عدم وجود تری راہ کے مسافر ہیں جہاں کوئی نہیں پہنچا وہاں کا مالک تو

بہت قریب سے دیکھا ہے تجھ کو سجدے میں نماز تیرے لئے ہے اذاں کا مالک تو

تیری رضا کے بغیر ایک سانس نا ممکن مری " نہیں" ترے قبضے میں "ہاں" کا مالک تو

برستی آنکھ کے پیچھے گھٹائیں ہیں تیری دلوں میں بکھری ہوئی کہکشاں کا مالک تو

تیرے خیال سے آباد میری تنہائی رگوں میں چلتے ہوئے کارواں کا مالک تو

تمام رنگ بھرے کائنات میں تو نے خوشی کا رنج کا سود و زیاں کا مالک تو