Yeh Arz Gunahgar Ki Hai

Yeh arz gunahgar ki hai Shah-e-Zamanah Jab aakhiri waqt aaye mujhe bhool na jaana

Sakrat ki jab sakhtiyan sarkar hon taari Lillah! mujhe apne nazaron mein gamana

Dar lagta hai imaan kahin ho jaaye na barbaad Sarkar bure khatme se mujhko bachana

Jab rooh mere tan se nikalne ki ghadi ho Shaitan-e-laeen se mera imaan bachana

Find Your Favorite Lyrics Anytime, Anywhere - Install the App Today!

Jab dam ho labon par ae Shahanshah-e-Madinah Tum jalwa dikhana mujhe kalma bhi padhana

Aaqa mera jis waqt ke dam toot raha ho Us waqt mujhe chehra-e-purnoor dikhana

Sarkar! mujhe naz mein mat chhodna tanha Tum aake mujhe Surah-e-Yaseen sunana

Jab gor-e-ghariban ko chale mera janazah Rahmat ki rida us pe khudara tum udhana

Jab qabr mein ahbab chalein mujhko lita kar Ae pyare Nabi gor ki wahshat se bachana

Tay khair se tadfeen ke hon saare marahil Ho qabr ka bhi lutf se aasan dabana

Jis waqt Nakirein karein aa ke sawalat Aaqa mujhe tum aa ke jawabat sikhana

Sun rakkha hai hota hai bada sakht andhera Turbat mein meri noor ka fanous jalana

Jab qabr ki tanhai mein ghabraye mera dil Dene ko dilasa Shah-e-Abrar tu aana

Jab roz-e-qayamat rahe ik meel pe sooraj Kausar ka chhalakta mujhe ik jaam pilana

Ho arsa-e-mahshar mein mera chaak na parda Lillah mujhe daman-e-rahmat mein chhupana

Mahshar mein hisab aah! main de hi na sakunga Rahmat na hui hoga jahannam mein thikana

Farmayenge jis waqt gulamon ki shafa'at Main bhi hoon ghulam aap ka mujhko na bhulana

Farma ke shafa'at meri ae Shafi-e-Mahshar! Dozakh se bacha kar mujhe jannat mein basana

Ya Shah-e-Madinah! Mah-e-Ramzan ka sadqa Jannat mein padosi mujhe tum apna banana

Allah ki rahmat se yeh mayoos nahi hai Hojayega Attar ki bakhshish ka bahana