Ya Khuda Hajj Pe Bula

Ya Khuda! Hajj pe bula aake main Kaaba dekhun Kaash! Ik baar main phir meetha Madinah dekhun

Phir muyassar ho mujhe kaash! Wuqoof-e-Arafat Jalwah main Muzdalifah aur Mina ka dekhun

Jhoom kar khoob karoon khan-e-Kaaba ka tawaaf Phir Madine ko chaloon Gumbad-e-Khazra dekhun

Sabz gumbad ka haseen jalwah dikha de Ya Rab Masjid-e-Nabwi ka pur-noor manarah dekhun

Rauza-e-Paak ke saaye mein bula kar Aaqa Aankh de dijiye main Aap ka jalwah dekhun

Choom loon kaash! nigahon se sunahri jaali Ashkbaar aankh se mimbar ka bhi jalwah dekhun

Kaash! woh aankh ata ho main Madine aa kar Jis taraf jaaun udhar noor barasta dekhun

Jaam-e-ishq aisa pila dijiye Jaan-e-Aalam Har ghari aahein bharoon khud ko tarapta dekhun

Chashm-e-tar soz-e-jigar dijiye qalb-e-muztar Ishq mein rota rahoon jab bhi main Rauza dekhun

Sozish-e-ishq mein jalta hi rahoon main har dam Aankh se gham mein tere khoon barasta dekhun

More Lyrics, Less Storage - Install the App and Ditch the Screenshots!

Us pe rashk aata hai aur pyaar bahut aata hai Ishq mein tere jise rota bilakta dekhun

Kaash! main rone lagoon qalb bhi ho mera udaas Jab Madine ki taraf qaafilah jaata dekhun

Zairo! kehna yeh ro ro ke Shaha! ik maskeen Keh raha tha yeh tarap kar: ’’Main Madinah dekhun‘‘

Tu jo chahe to meri aankh se parde utthein Main watan se bhi Madine ka nazara dekhun

Woh khilate hain pilate hain nibhate bhi hain Kyun kahin jaaun kisi aur taraf kya dekhun

Apni rahmat se mujhe kar do ata aisi bahaar Munh kabhi bhi na khazan ka mere Aaqa dekhun

Tere ehsaan karoron hain ho yeh bhi ehsaan Ya Khuda naz' mein jalwah main Nabi ka dekhun

Baagh-e-Jannat mein jawaar apna ata farma do Khuld mein har ghari jalwah main tumhara dekhun

Daur kar qadmon mein Attar giroon main us dam Hashr mein jis ghari Sarkaar ko aata dekhun