Thandi Thandi Hawa Haram Ki Hai

Thandi thandi hawa Haram ki hai Barish Allah ke karam ki hai

Aaminah ke makaan pe roz-o-shab Barish Allah ke karam ki hai

Jo Haram ka adab karein un par Barish Allah ke karam ki hai

Noori chadar tani hai Ka'be par Barish Allah ke karam ki hai

Multazam aur be-e-Zamzam par Barish Allah ke karam ki hai

Baab-o-Meezab-o-Hajar-e-Aswad par Barish Allah ke karam ki hai

Mustajaar aur Rukn-e-Shaami par Barish Allah ke karam ki hai

Kaisa Rukn-e-Iraaqi hai nikhra Barish Allah ke karam ki hai

Mustajaab-o-Hateem par beshak Barish Allah ke karam ki hai

Rehmatein hain mataaf par bhi aur Barish Allah ke karam ki hai

Paak ghar ke tawaaf walon par barish Allah ke karam ki hai

Makkah-e-Paak par Madine par Barish Allah ke karam ki hai

Sabz gumbad pe rehmatein hain aur barish Allah ke karam ki hai

Ka'ba-e-Paak par manaaron par Barish Allah ke karam ki hai

Un ke mehraab aur mimbar par Barish Allah ke karam ki hai

Ya-Ilahi! Gham-e-Madinah de Iltija Mustafa ke gham ki hai

Qalb-e-muztar ki laaj rakh Maula Yeh sada meri chashm-e-nam ki hai

Jo nazar aa rahi hai har jaanib Sab bahaar un ke dam-e-qadam ki hai

Mere Maula gham-e-Madinah hi Aabroo meri chashm-e-nam ki hai

Sozish-e-seenah-o-jigar de de Aarzoo mujh ko chashm-e-nam ki hai

Download Lyrics & Access Offline - Install Our App Now!

Khoon rulaaye sada teri ulfat Aarzoo aisi chashm-e-nam ki hai

Aafton se bacha le Ya-Allah Mujh pe yalghaar ranj-o-gham ki hai

Bigdi taqdeer abhi sanwar jaaye Der ik junbish-e-qalam ki hai

Qaaflon mein safar karo yaaro! Bil-yaqeen raah yeh Iram ki hai

Saare apnaao ''Madani In'aamaat'' Gar tumhein aarzoo Iram ki hai

Laaiq-e-naar hain mere aamaal Iltija Ya-Khuda karam ki hai

Apni ummat ki maghfirat ho jaaye Aarzoo Shaafi-e-Umam ki hai

Bakhsh de ab to mujh ko Ya-Allah Yeh du'a tujh se chashm-e-nam ki hai

De de ''Qufl-e-Madinah'' Ya-Allah Ho karam iltija karam ki hai

Kaash! Har saal hajj kare Attaar Arz badkaar par karam ki hai