Saboye Jaan Mein Chhlakta

Suboo-e-jaan mein chalakta hai keemiya ki tarah Koi sharab nahi ishq-e-Mustafa ﷺ ki tarah

Qadah gusaar hain us ki amaan mein jis ka wajood Safeena-e-do-sara mein hai nakhuda ki tarah

Woh jis ke lutf se khulta hai ghuncha-e-idraak Woh jis ka naam naseem-e-girah-kusha ki tarah

More Lyrics, Less Storage - Install the App and Ditch the Screenshots!

Tilism-e-jaan mein woh aaina-daar-e-mehboobi Hareem-e-arsh mein woh yaar-aashna ki tarah

Woh jis ka jazb tha bedari-e-jahan ka sabab Woh jis ka azm tha dastoor-e-irtiqa ki tarah

Woh jis ka silsila-e-jood abr-e-gauhar-baar Woh jis ka dast-e-ata masdar-e-ata ki tarah

Khizaan ke hajla-e-veeraan mein woh shaguft-e-bahaar Fana ke dasht mein woh rauda-e-baqa ki tarah

Baseet jis ki jalalat hamal se meezaan tak Muheet jis ki sa'adat khat-e-sama ki tarah

Sawaad-e-subh-e-azal jis ke raaste ka ghubaar Tilism-e-lauh-e-abad jis ke naqsh-e-paa ki tarah

Woh arsh o farsh o zamaan o makaan ka naqsh-e-muraad Woh ibtida ke muqabil woh intiha ki tarah