Pao Ge Bakhshish

Paaoge bakhshishein qaafile mein chalo Jannatein bhi milein, qaafile mein chalo

Rizq ke dar khulein, qaafile mein chalo Barkatein bhi milein, qaafile mein chalo

Zakhm bigre bharein, phore phunsiyan mitein Garhon masse jharein, qaafile mein chalo

Kaale yarqaan mein, kyun pareshan hain Paayenge sehattein, qaafile mein chalo

Teerhi hon haddiyan, hongi seedhi miyan Dard saare mitein, qaafile mein chalo

More Lyrics, Less Storage - Install the App and Ditch the Screenshots!

Dard-e-gambheer ho, koi dilgeer ho Hongi hal mushkilein, qaafile mein chalo

Garche bimariyan, hon kahin pathriyan Paaoge sehattein, qaafile mein chalo

Tangdasti ho ghar mein ya naachaqiyaan Aayengi barkatein, qaafile mein chalo

Jo ke mafqood ho woh bhi maujood ho InshaAllah chalein, qaafile mein chalo

Door honge alam hoga Rab ka karam Gham ke maare sunein qaafile mein chalo

Dard-e-sar ho agar dukh rahi ho kamar Dard dono mitein, qaafile mein chalo

Baap bimaar ho, sakht bezaar ho Paayega sehattein, qaafile mein chalo

Maan jo bimaar ho, ya woh naachaar ho Ranj-o-gham mat karein, qaafile mein chalo

Wa ho baab-e-karam, door hon ranj-o-gham Phir se khushiyan milein, qaafile mein chalo

Zalzala aaye gar, aake chha jaaye gar Sirf Haq se darein qaafile mein chalo

Zalzala aam tha har su kohraam tha Is se lo ibratein qaafile mein chalo

Zalzale se amaan, dega Rabb-e-Jahaan Sab duayein karein, qaafile mein chalo

Hon bapa zalzale, garche aandhi chale Sabr karte rahein, qaafile mein chalo

Hai shifa hi shifa, marhaba! marhaba! Aake khud dekh lein, qaafile mein chalo

Pet mein dard ho rang bhi zard ho Aake lo sehattein qaafile mein chalo

Hai talab deed ki, deed ki eid ki Kya ajab woh dikhein qaafile mein chalo

Dil mein gar dard ho dar se rukh zard ho Paaoge farhattein qaafile mein chalo

Aafton se na dar, rakh karam par nazar Lene aasaaishein, qaafile mein chalo

Aap ko chaaragar ne go maayoos kar Bhi diya mat darein, qaafile mein chalo

Ghar mein anban na ho, koi uljhan na ho Gham ke saaye dhalein, qaafile mein chalo

Biwi bachche sabhi, khoob paayein khushi Khairiyat se rahein, qaafile mein chalo

Zauja bimaar hai, beta "bekaar" hai Gham tumhaare mitein, qaafile mein chalo

Naukri chahiye, aaiye aaiye Qaafile mein chalein, qaafile mein chalo

Gham se rote hue, jaan khote hue Marhaba! hans padein! qaafile mein chalo

Qalb bhi shaad ho, ghar bhi aabad ho Shaadiyan bhi rachein, qaafile mein chalo

Qarz utar jaayega, khoob rizq aayega Sab balayein talein, qaafile mein chalo

Gar ho irq-un-nisa aariza koi sa De Khuda sehattein, qaafile mein chalo

Ghar mein "umeed" ho, us ki tamheed ho Jald hi chal padein, qaafile mein chalo

Zachcha ki khair ho, bachcha bil-khair ho Uthiye himmat karein, qaafile mein chalo

Door bimariyan aur pareshaniyan Hongi bas chal padein, qaafile mein chalo

Aake tum ba-adab, dekh lo fazl-e-Rab Madani munne milein, qaafile mein chalo

Khoti qismat khari, god hogi hari Munna munni milein, qaafile mein chalo

Sun le Attar ki, apne ghamkhwar ki Yeh nida "sab chalein"! qaafile mein chalo