Mujhe Uski Qismat Pe Rashk Aa Raha Hai

Mujhe us ki qismat pe rashk aa raha hai Madine ka jis ko bulawa mila hai

Yeh jo hichkiyan baandh kar ro raha hai Gham-e-hijr ne is ko tarpaa diya hai

Tabibo! tumhara yahan kaam kya hai! Ke yeh to mareez-e-Habib-e-Khuda hai

More Lyrics, Less Storage - Install the App and Ditch the Screenshots!

Tere aashiqon ko qarar aaye kyonkar? Madine se doori bari jaanguza hai

Bulalo! isi saal Aaqa bulalo! Shaha! Hajj ka mausam qareeb aa raha hai

Tere dar ke hote kahan jayen Aaqa Ke tu hi ghareebon ka ik aasra hai

Hamari tamannayen bar ayen Maula! Hamara to sab haal tum par khula hai

Safeena kabhi ka mera doob jaata Teri rehmaton ne sahara diya hai

Nigah-e-karam haal-e-khasta jigar par Tasalsul gunah ka barha ja raha hai

Shifa do gunahon ke amraaz se ab Ke bimaar-e-isyaan mara ja raha hai

Gham-e-do jahan se chura ke Khudaya Gham-e-Mustafa de yehi iltija hai

Madina ho seena to seena Madina Meri zindagi ka yehi mudda'a hai

Rahe wird-e-lab bas Madina Madina Yehi aarzoo Ya Rasool-e-Khuda hai

Muballigh banun kaash! main sunnaton ka Sada deen ki khidmat karoon yeh dua hai

Habib-e-Khuda aa ke chamkaiye ab Andhera meri qabr mein chha raha hai

Paye Peer-o-Murshid Baqi-e-Mubarak Ata ho yeh tootay dilon ki sada hai

Shaha! muskuraate huye aa bhi jao! Ke dil shor-e-mehshar se ghabra raha hai

Shaha! apni jannat mein qadmon mein rakhna Yehi aajizana meri iltija hai

Na qadmon se Attarؔ ko door karna Yeh tera gada hai bhala ya bura hai