Mujh Ko Allah Se Muhabat Hai

Mujh ko Allah se mohabbat hai Yeh usi ki ata-o-rehmat hai

Jis ko Sarkar se mohabbat hai Us ki bakhshish ki yeh zamaanat hai

Dil mein Quran ki mere azmat hai Aur pyari har ek sunnat hai

Sab se achi Nabi ki seerat hai Chand se bhi haseen surat hai

Mil gayi mujh ko teri nisbat hai Yeh sharaf hai badi sa'adat hai

Aal-o-Ashab se mohabbat hai Aur sab Awliya se ulfat hai

Yeh sab Allah ki inayat hai Mil gayi Mustafa ki ummat hai

Ghaus-o-Khwaja ki dil mein ulfat hai Qalb mein ishq-e-Aala Hazrat hai

Instant Access to Thousands of Lyrics - Tap to Install!

Marhaba! Apni khoob qismat hai Peer-o-Murshid ki dil mein chahat hai

Aashiqan-e-Nabi se ulfat hai Dushmanan-e-Nabi se nafrat hai

Haaye duniya ki dil mein chahat hai Nafs ki yeh khuli shararat hai

Na talabgar-e-maal-o-daulat hai Is gada ko karam ki haajat hai

Do jahan mein wuhi salamat hai Jis musalman pe Rab ki rehmat hai

Ya Nabi! Phans gaya halakat hai Yeh gada sail-e-shafa'at hai

Haq se umeed-e-afw-o-rehmat hai Tere sadqe mein milni jannat hai

Ek arsay se dil mein raghbat hai Su-e-Taibah chaloon yeh hasrat hai

Ek muddat se hijr-o-furqat hai Kya Madinay ki ab ijazat hai?

Aah! Pallay na kuch tilawat hai Na duroodon ki koi kasrat hai

Aah! Isyaan ki khoob kasrat hai Ya Nabi! Iltija-e-rehmat hai

Aisi isyaan ki pad gayi lat hai Phir wuhi ba'ad-e-tauba halat hai

Nek bandon pe Rab ki rehmat hai Har gunah ba'is-e-halakat hai

Aa gaya aah! Waqt-e-rihlat hai Yeh gada talib-e-ziyarat hai

Aankh nam hai na kuch nadamat hai Aah! A'maal ki yeh shamat hai

Maut sar par hai tujh pe hairat hai Jaag kyun mehv-e-khwab-e-ghaflat hai

Teri Attar kya haqeeqat hai Jo hai Sarkar ki badaulat hai