Meri Zindagi Meri Aabroo

Meri zindagi meri aabroo yeh ataa-e-yaad-e-Rasool hai Jo yeh dard hai toh qarar-e-jaan hai agar yeh zakhm toh phool hai

Wahi zindagi toh hai bandagi keh jo waqf-e-naat-e-Rasool hai Jo faqat unhi ke liye uthay, woh nigah unko qabool hai

Jo teri nigah mein aa gaya woh bari panah mein aa gaya Tere wasilay se hai mutma’in tere wastay hi malool hai

Mera soz bhi, mera saaz bhi, mera dil bhi, dil ka gudaaz bhi Meri chashm-e-tar ki bahar hai, mujhe jaan-o-dil se qabool hai

Tu fida hai hoor-o-qasoor par, mujhe naaz zikr-e-Rasool par Teri khuld kaisi hai tu bata meri khuld koo-e-Rasool hai

Tere zikr ki hain yeh barkatein mere bigray kaam sanwar gaye Jahan teri yaad hai dil nasheen wahin rehmaton ka nuzool hai

Yahi aarzoo jo ho surkhuru, milay do jahan ki aabroo Main kahoon ghulam hoon aap ka woh kahein keh humko qabool hai

More Lyrics, Less Storage - Install the App and Ditch the Screenshots!

Yeh baray naseeb ki baat hai, tere lab pe Anjum khush-nawa Kabhi hamd-e-Rabb-e-Jaleel hai kabhi naat-e-pak-e-Rasool hai