Mera Dil Pak Ho Sarkar

Mera dil paak ho Sarkar ﷺ duniya ki mohabbat se Mujhe ho jaaye nafrat kaash Aaqaؐ maal-o-daulat se

Madine se agarche duur hoon teri mashiyat se Tadapne ki sa'adat de Ilahi hijr-o-furqat se

Na London ki na America na Paris ki sayahat se Sukoon-e-qalb milta hai Madine ki ziyarat se

Khuda hafiz Madine ke musafir ja Khuda hafiz Chalenge su-e-Tayyaba bhi ik din unki rehmat se

Khuda ki tujh pe laakhon rehmatein hon za'ir-e-Tayyaba! Salaam-e-shauq keh dena mira Mah-e-Risalat ﷺ se

Shahanshahؐ Madina is ko bhi seene lagate hain Jise sab log thukrate hain nafrat se haqarat se

Tumhari na'l-e-aqdas hi hamara taaj-e-izzat hai Hamara wasta kya taaj-e-shahi se hukoomat se

Gunahon ki main chadar taan kar din raat sota hoon Jaga do Ya RasoolAllahؐ mujh ko khwab-e-ghaflat se

Mera sara wajood afsos luthra hai gunahon se Mujhe ab paak kar deeje gunahon ki nahoosat se

Nadamat se gunahon ka izala kuch to ho jata Mujhe rona bhi to aata nahin haaye nadamat se

Karam karde bharam rakh le khula hai daftar-e-aamaal Go badkar-o-kameena hoon magar hoon teri ummat se

Na nama mein ibadat hai na palle kuch riyazat hai Ilahi! maghfirat farma hamari apni rehmat se

Download Lyrics & Access Offline - Install Our App Now!

Ilahi wasta deta hoon main meethe Madine ka Bachana to mujhe dono jahan ki har museebat se

Musalman Eid-e-MiladunNabi ﷺ par shad hote hain Faqat chidta hai to Shaitan hi jashn-e-wiladat se

Bategi rehmaton ki jis ghadi khairat mehshar mein Shaha ﷺ mehroom mat rakhna mujhe apni shafa'at se

Tumhein maloom kya bhai Khuda ka kaun hai maqbool Kisi Sunni ko mat dekho kabhi bhi tum haqarat se

Ujala hi ujala hoga us ki qabr mein Attar Ho jis ka dil munawwar ulfat-e-mehr-e-Risalatؐ se

Karam se khuld mein Attar jis dam ja rahe honge Shayateen dekhte honge sabhi mud mud ke hasrat se