Masjid e Nabwi Tu Hi Bata

Masjid-e-Nabvi tu hi bata kuch samaan woh kaisa pyara hoga Sehan mein Aaqa baithe honge gird as-haab ka halqa hoga

Do jag ke mukhtaar ki baatein, deen-o-daanish ki soghaatein Is mehfil mein un phoolon se har koi daaman bharta hoga

Bazm-e-Nabuwat mein Siddique bhi Farooq-o-Usman-o-Ali bhi Charon yaar sitare honge beech mein chand chamakta hoga

Un jalwon ke din bhi teri yaad ka hissa honge jin mein Hasan ؑ Hussain ؑ ka bachpan Nana ki godi mein khela hoga

Tu ne apne darwaze par woh bachay bhi dekhe honge Jin bachon ne pyar se aksar Nabi ka daaman thama hoga

Qurb-e-Huzoor mein ahl-e-Madinah kaisi rahat paate honge Dil-e-Awais gham-e-furqat se subah-o-shaam tadapta hoga

Arz-e-Madinah baang-e-Bilal se teri fiza jab goonjti hogi Is ke suroor-o-soz ki ro mein har koi beh jata hoga

Download Lyrics & Access Offline - Install Our App Now!

Bahr-e-shafaat jab bhi dua ko Hazrat haath uthate honge Arsh-e-Mashiyat bahr-e-ijabat Tayyaba par jhuk jata hoga

Ummat-e-Mursal mein hoon Tarab aur is rishtay par naazan hoon Is ki qismat ka kya kehna jo mehfil mein baitha hoga