Marhaba Sadd Marhaba

Marhaba sad marhaba! Phir aamad-e-Ramzan hai Khil uthay murjhaye dil taza hua imaan hai

Ya-Khuda hum aasiyon par yeh bada ehsaan hai Zindagi mein phir ata hum ko kiya Ramzan hai

Tujh pe sadqay jaaun Ramzan! Tu azimus-shaan hai Tujh mein nazil Haq Ta'ala ne kiya Quran hai

Abr-e-rehmat chha gaya hai aur samaan hai noor noor Fazl-e-Rabb se maghfirat ka ho gaya saamaan hai

Har ghari rehmat bhari hai har taraf hain barkatein Maah-e-Ramzan rehmaton aur barkaton ki kaan hai

Aagaya Ramzan ibadat par kamar ab baandh lo Faiz le lo jald yeh din tees ka mehmaan hai

Aasiyon ki maghfirat ka lekar aaya hai payam Jhoom jaao mujrimo! Ramzan meh-e-ghufran hai

Bhaiyo behno! Karo sab nekiyon par nekiyan Pad gaye dozakh pe taalay qaid mein Shaitan hai

Bhaiyo behno! Gunahon se sabhi tauba karo Khuld ke dar khul gaye hain dakhla aasaan hai

Kam hua zor-e-gunah aur masjidain aabad hain Maah-e-Ramzanul Mubarak ka yeh sab faizan hai

Rozay daro! Jhoom jaao kyunke deedar-e-Khuda Khuld mein hoga tumhein yeh wa'da-e-Rehman hai

Do jahan ki ne'matein milti hain roza-daar ko Jo nahi rakhta hai roza woh bada naadaan hai

Offline Lyrics Anytime, Anywhere - Download the App Today!

Ya-Ilahi! Tu Madine mein kabhi Ramzan dikha Muddaton se dil mein yeh Attar ke armaan hai