Kuch Bhi Ho Jaye

Kuch bhi ho, khoo-e-yaar se hatne ki khoo na ho Ya Rabb woh madh-o-naat ho jis mein ghulu na ho

Mazmoon aafrini-o-nukta sarai mein Aisa na ho ke chehra-e-haq surkhroo na ho

Meri sipah mujhi pe na talwar khench le Mera likha hua kahin mera adoo na ho

Be-kaar hi na jaayen sukhan ki riyazatein Jaise koi namaz padhe aur wuzu mein na ho

Jaise kisi ne apni ibadat ke za'm mein Niyat toh baandh rakhi ho, rukh-e-qibla-roo na ho

Aisa na ho ke ahl-e-mohabbat ke naam par Jo lafz ho woh kizb-o-riya ka namoona ho

Aye sidq-e-ishq zaad mere sach ki laaj rakh Yeh aab-e-aa'ina kabhi be-aabroo na ho

Aye ishq seena-soz mere dil se dil mila Aur yun ke bas kalaam ho aur guftagu na ho

Tujh par agar main sher likhoon tujh ko bhool kar Ta-umr meri aankh mere roobaroo na ho

Main khaak daalta hoon zar-o-seem-e-harf par Aye yaar-e-bemisaal agar in mein Tu na ho

No Internet? No Problem! Get the App for Offline Lyrics!

Maqbool ahl-e-bait-e-mohabbat rahoon Saud Duniya ki daad chahiye mere chaar-soo na ho