Kehne Laga Bhanwar Ke

Kehne laga bhanwar ke tujhe raasta diya Main ne use Huzoor ka jab waasta diya

Shab bhi utaar baithi sar-e-maatami libaas Main ne use jo naat ka roshan diya diya

Kehte hain unki naat hi sab apne rang mein Mahtaab, aaftaab, gulistaa, saba diya

Tayyaba bula ke mujh se gunaah-gaar shakhs ko Aaqa ﷺ ne apna Gumbad-e-Khizra dikha diya

Sunte hue woh naat mujhe khuld le gaye Mahshar mein naat kehne ka aisa sila diya

Is baat par lahad mein Shah-e-Deen bhi khush hue Hum ne unhein Ali ka qaseeda suna diya

Yun mast hain ke apni bhi hum ko khabar nahin Ek ghoont apni deed ka aisa pila diya

Ek shab sajayi mahfil-e-sad aah-o-ashk-o-dard Phir dil ne naat-e-Shah ka mujhe mashwara diya

Pehle to mujh ko shauq-e-huzoori ata kiya Phir fikr-e-naat-goi ka ek daaira diya

Pur-noor kar rahe hain bahar-e-charaagh aap Kehne laga Hussain se bujhta hua diya

Parh kar durood-e-paak diya main ne gul ko aab Aur us ne naghaton ka mujhe silsila diya

No More Screenshots! Save Storage with Our Lyrics App!

Aasi ho tum agar to shifa’at hai mere paas Yeh keh ke mere Shah ne mujhe hausla diya

Aaqa mere Kareem mere Qasim-e-Ata Hasni to kha raha hai faqat aap ka diya