Jo Harf o Hunar Sare Zamano Ko Miley

Jo harf-o-hunar saare zamaano ko mile hain, sab tere sile hain Idraak-o-tafakkur ke jahan phool khile hain, sab tere sile hain

Quran ka chalan Mursal-e-yakta se chala hai jo tujh ko mila hai Phir hum ko abad tak ke payamaat mile hain, sab tere sile hain

Tu Sayyid-e-Wajeed hai, tu Mamoon-o-Ameen hai, Misbah-e-jabeen hai Jo saare hadaf saare sharaf hum ko mile hain, sab tere sile hain

Instant Access to Thousands of Lyrics - Tap to Install!

Tu kaamil-o-aadil hai, tu faateh hai qavi hai, nabiyon ka Nabi hai Barhaq ko jo na-haq se shikayat hai gile hain, sab tere sile hain

Baatil ke muqabil hamein avval pe hai imaan, aakhir pe hai bai'at Baatil ke muqabil na kabhi hont sile hain, sab tere sile hain

Razzaq ne jo kuch bhi diya, us pe hoon qane', peeche hoon main tere Kab faqr-o-qana'at mein mere hont hile hain, sab tere sile hain

Ijaab-e-dua tere vaseele se hui hai, tu Haq hai, Wali hai Ab mujh ko muqaddar se na shikva na gile hain, sab tere sile hain