Ism e Muhammad Lab Pe Aya

Ism-e-Muhammad lab pe aaya, naat hui Aaqa ne yun bhaag jagaya, naat hui

Saans muattar ho gaya jab bhi parha durood Yaad ne un ki khoob rulaya, naat hui

Khush-bakhti hai, hub-e-Rasool-e-Akram ka Qaryah-e-dil mein deep jalaya, naat hui

Jhoomte jhoomte qadmon mein ashjaar aaye Kankariyon se kalma parhaya, naat hui

Chaand ko ek ishare se do tukre kiya Doobte suraj ko lautaya, naat hui

Dil ki hasrat junhi palkon par aayi Khair talab se barh kar paya, naat hui

Allah ke Mehboob-e-Kareem se bakhshish ke Shehr-e-karam se gohar laya, naat hui

Jaan se barh kar qeemti hai jo paas mere Nisbat-e-Hazrat ka sarmaya, naat hui

Taibah mein aaye to Tala-al-badru ka geet Bachiyon ne jab mil kar gaya, naat hui

Bakht-e-rasa Hassan ka dekho, Aaqa ne Mimbar par khud aap bithaya, naat hui

Chadar-e-rehmat Busiri ko de ke kaha Khoob qaseeda dil ko bhaya, naat hui

Free Up Space - Get Lyrics Without Bulky Screenshots!

Sallallahu alaihi wa sallam parh kar khoob Bhej ke samjho noor-e-hadaya, naat hui

Sidrah nahin, bas Aw adna ki baat karo Arsh-e-bareen pe jab bulwaya, naat hui

De ke Taib ek saleeqa kehne ka Jazb-o-kaif-o-shauq barhaya, naat hui