Hukam Yazdan Se Mila

Hukm-e-Yazdan se mila, izn-e-Payambar se mila Mujh ko midhat ka hunar, mere muqaddar se mila

Kab se is khan-e-aaft mein muqayyad thi main Aur aise mein bulawa mujhe us dar se mila

Jald le chal mujhe ae shauq-e-safar un ki taraf Mere Haadi ﷺ, mere Aaqa ﷺ, mere rahbar se mila

Qulzum-e-ashk behati hui pahunchun gi wahan Ik ishara jo mujhe Raud-e-Anwar se mila

Ek ek boond se sau pyaas bujha loon gi main Joon hi ik jaam mujhe Saqi-e-Kausar se mila

Ramz-e-takhleeq-e-jahan, khilqat-e-Ahmed mein nihan Kun ka mafhoom isi chehr-e-Anwar se mila

Az azal ta ba abad, rah-e-hidayat hai khuli Sara manshoor isi noor ke mimbar se mila

Likh saka kaun sar-e-arsh mulaqaat ka haal Shab-e-Meraj Khuda apne hi dilbar ﷺ se mila

Ae mere khwab dikha naqsh-e-kaf-e-pa-e-Rasool ﷺ Ae meri neend kabhi rooh-e-munawwar se mila

Ut zamane, tu mujhe raund ke rakh de lekin Mere khashak ko us husn-e-gul-e-tar se mila

Asr-e-hazir ke sawalat ki zad par hai yeh aql Aagahi mujh ko isi ilm ke daftar se mila

Zakhm kha kha ke duaein thin labon par jis ﷺ ke Rah-e-Taif mujhe us sabr ke paikar se mila

Deen ki talqeen ka aaghaz hua tha jis ja Auj-e-Faran mujhe us sham ke manzar se mila

Get Lyrics On-The-Go! Download Our App Now!

Un ﷺ ki ummat mein rakha bakht-e-rasa ne mujh ko Mujh ko yeh auj-o-sharaf mere muqaddar se mila