Bulawa Dobara Phir Ik Baar Aye

Bulawa dobara phir ik baar aaye Madine mein Aqa! gunahgar aaye

Mere ashk behne lagein kaash us dam Nazar joon hi Taiba ka gulzar aaye

Dil-e-muztarib ki barhe beqarari Tarap kar giroon joon hi darbar aaye

Nazar mein nahin koi jachta gulistan Pasand us ko sahra-e-Sarkar aaye

Hai apni jagah husn phoolon ka lekin Pasand us ko Taiba hi ka khaar aaye

Mahallat oonche nahin chahta main Madine ka qismat mein kuhsar aaye

Aqeedat se sar jhuk gaya us ghari jab Nazar sabz gumbad ke anwar aaye

Tere sabz gumbad pe jaye woh qurban Madine mein jo koi ik baar aaye

Tumhari shafa'at ka haqdar thehre Jo darbar mein bakht-e-bedar aaye

Tere hi karam se hamara bharam hai Gunahon ka sar par liye baar aaye

Ata ho sanad maghfirat ki ata ho Tere dar pe tere gunahgar aaye

Idhar bhi Masiha nigah-e-shifa ho Tere dar pe isyan ke bimar aaye

Gunahon ki kasrat se ghabra gaye jab Woh mehshar mein su-e-gunahgar aaye

Hui qabr roshan hamari usi dam Liye jab woh chehra chamakdar aaye

Pai peer-o-murshid hamein apna kehdo Yeh hum aarzu le ke darbar aaye

Shaha tujh se tujh hi ko mangenge hum toh Tere dar pe jis roz Sarkar aaye

Dawa har marz ki hai khaak-e-Madinah Shifa paye dar par jo bimar aaye

Sar-e-hashr daman mein lenge use jo Nadamat se rota gunahgar aaye

Tere ishq mein aisa ho jaaun be-khud Kabhi hosh mujh ko na Sarkar aaye

Ishara mile kaash! jannat ka foran Sar-e-hashr jis dam yeh badkar aaye

Nigah-e-karam ho karam jaan-e-alam Dil-e-gham-zada le ke gham-khwar aaye

Sada sunnatein aam karta rahoon main Isi haal mein maut Sarkar aaye

Pai Shah-e-karb-o-bala maut mujh ko Madine ki galiyon mein Sarkar aaye

Sab islami behnon ko parda ata ho Na paas in ke iblis-e-ayyar aaye

Never Be Without Your Favorite Lyrics - Get the App for Offline Access!

Sab islami bhai bhi fashion se bhagein Shaha! sunnaton par unhein pyar aaye

Bulalo Madine mein Shah-e-Madinah Tarapta hua kaash! badkar aaye

Tere gham mein be-haal ho jaye Aqa Palat ke jo Taiba se Attar aaye