Bulawa Dobara Phir Ik Baar Aye

بُلاوا دوبارہ پھر اِک بار آئے مدینے میں آقا! گُنہگار آئے

مِرے اَشْک بہنے لگیں کاش اُس دم نظر جُوں ہی طیبہ کا گلزار آئے

دِلِ مُضْطَرِب کی بڑھے بَیقراری تڑپ کر گِروں جُوں ہی دربار آئے

نظر میں نہیں کوئی جچتا گلستاں پسند اس کو صَحرائے سرکار آئے

ہے اپنی جگہ حُسن پُھولوں کا لیکن پسند اس کو طیبہ ہی کا خار آئے

مَحَلّات اُونچے نہیں چَاہتا میں مدینے کا قسمت میں کُہسار آئے

عقیدت سے سر جُھک گیا اُس گھڑی جب نظر سبز گنبد کے انوار آئے

تِرے سبز گُنبد پہ جائے وُہ قرباں مدینے میں جو کوئی اِکبار آئے

تمہاری شَفَاعَت کا حَقدار ٹھہرے جو دربار میں بَخت بَیدار آئے

تِرے ہی کرم سے ہمارا بھرم ہے گناہوں کا سر پر لئے بَار آئے

عطا ہو سَنَد مَغفِرت کی عَطا ہو تِرے دَر پہ تیرے گنہگار آئے

اِدھر بھی مَسیحا نِگاہِ شِفا ہو تِرے دَر پہ عِصیاں کے بیمار آئے

گُناہوں کی کثرت سے گھبرا گئے جَب وُہ محشر میں سُوئے گنہگار آئے

ہوئی قبر روشن ہماری اُسی دم لئے جب وہ چِہرہ چمکدار آئے

پئے پِیر و مرشِد ہمیں اپنا کہدو یہ ہم آرزو لے کے دربار آئے

شہا تجھ سے تجھ ہی کومَانگیں گے ہم تو ترے دَر پہ جس روز سرکار آئے

دوا ہر مَرض کی ہے خاکِ مدینہ شِفا پائے دَر پر جو بیمار آئے

سرِ حَشر دامن میں لیں گے اُسے جو نَدامت سے روتا گنہگار آئے

ترے عشق میں ایسا ہوجاؤں بے خود کبھی ہوش مجھ کو نہ سرکار آئے

اِشارہ ملے کاش! جنّت کا فوراً سرِ حشر جس دم یہ بدکار آئے

نگاہِ کرم ہو کرم جَانِ عالم دِلِ غم زَدہ لے کے غمخوار آئے

سدا سُنَّتیں عَام کرتا رہوں میں اِسی حال میں موت سرکار آئے

پَئے شاہِ کرب و بلا موت مُجھ کو مدینے کی گلیوں میں سرکار آئے

سب اسلامی بہنوں کو پَردہ عطا ہو نہ پاس اِن کے ابلیسِ عَیّار آئے

سب اسلامی بھائی بھی فیشن سے بھاگیں شہا! سُنّتوں پر انہیں پیار آئے

بُلالو مدینے میں شاہِ مدینہ تڑپتا ہوا کاش! بدکار آئے

ترے غم میں بے حَال ہو جائے آقا پلٹ کے جو طیبہ سے عطارؔ آئے