Bohat Ranjeeda o Ghamgeen Hai

Bahut ranjeeda-o-ghamgeen hai dil Ya RasoolAllah Karam kar do kali dil ki uthay khil Ya RasoolAllah

Balaon ne mujhe har samt se kuch aisa ghera hai Meray barhtay hi jatay hain masail Ya RasoolAllah

Paye imdad apnay sher-e-Hamza ko shaha bhejo Meray peechay para hai haye! qatil Ya RasoolAllah

Dil-e-maghmoom ka sab haal Aaqa tum pe zahir hai Shaha! hoon marham-e-taskeen ka sail Ya RasoolAllah

Gham-o-aalam ka mara hoon Aaqa be-sahara hoon Meri aasaan ho har ek mushkil Ya RasoolAllah

Tumhein deta hoon Maula wasita mein chaar yaaron ka Meray ho jaein tay mushkil marahil Ya RasoolAllah

Jo tu chahay to meray gham ki beri gir paray kat kar Nahi teray liye yeh koi mushkil Ya RasoolAllah

Musalman aah! ghafil ho gaye neki ki dawat se Barha jata hai haye! zor-e-batil Ya RasoolAllah

No More Screenshots! Save Storage with Our Lyrics App!

Shaha mandla rahi hai maut sar par phir bhi mera nafs Gunahon ki taraf hardam hai mail Ya RasoolAllah

Barha jata hai hardam aah! ghalba nafs-o-shaitan ka Yeh har neki mein ho jatay hain hail Ya RasoolAllah

Gunahon ke sabhi amraz Aaqa door farma do Sanwar jain meray sab bad-khasail Ya RasoolAllah

Na London ki na Paris ki na America ki hai khwahish Madinah hi hamari to hai manzil Ya RasoolAllah

Shafaat hashr mein farmao ge jab khush naseebon ki Mujhe kar lena Aaqa un mein shamil Ya RasoolAllah

Karam kar do bajuz isyaan nahi hai kuch bhi naamay mein Ibadat hai na pallay hain nawafil Ya RasoolAllah

Hamaray zakhm-haye-gham Rasool-e-Pak bhar jain Jigar ho teray gham mein kaash! ghayal Ya RasoolAllah

Kuch aisi aag ulfat ki laga do meray seenay mein Main tarpoon khoob tarpoon misl-e-bismil Ya RasoolAllah

Teray akhlaq par qurban teray ausaf par wari Musalman kya adu bhi tera qail Ya RasoolAllah

Shaha! jab khuld mein aap aagay aagay jain us dam kaash Main bhi ho jaaun peechay peechay dakhil Ya RasoolAllah

Abhi ban jaye bigri teray ik adna ishary se Teray Attarؔ ke hal hon masail Ya RasoolAllah