Baray Lateef Hain Nazuk Se

Baray lateef hain nazuk say ghar mein rehte hain Mere Huzoor ﷺ meri chashm-e-tar mein rehte hain

Hamare dil mein hamare jigar mein rehte hain Unhi kay ghar hain yeh woh apne ghar mein rehte hain

Yeh waqea hai libas-e-bashar bhi dhoka hai Yeh mojza hai libas-e-bashar mein rehte hain

Maqam unka na farsh-e-zameen na arsh-e-bareen Woh apne chahne walon kay ghar mein rehte hain

Malaika bhi aqeedat say dekhte hain unhein Jo khush naseeb Nabi ﷺ kay nagar mein rehte hain

Yaqeen wale kahan say chalay kahan pohanchay Jo ahl-e-shak hain agar mein magar mein rehte hain

Khuda kay noor ko apni tarah samajhte hain Yeh kaun log hain kis kay asar mein rehte hain

Rahein woh apnon say ghafil aray ma’azAllah Khusha naseeb hum unki nazar mein rehte hain

Stop Wasting Storage - Download Lyrics in Lightweight Text Format!

Woh aur hi tha jo qausain par nazar aaya Malak toh apni had-e-baal-o-par mein rehte hain

Jo Akhtar un kay tasawwur mein subh-o-shaam karein Kahin bhi rehte hon Taiba nagar mein rehte hain