Afzal Hai Mursalon Mein Rasalat

Afzal hai mursalon mein risalat Huzoor ﷺ ki Akmal hai ambiya mein nabuwat Huzoor ﷺ ki

Hai zarra zarra un ki tajalli ka ik suragh Aati hai phool phool se nikhat Huzoor ﷺ ki

Pehchan lein ge aap woh apnon ko hashr mein Ghafil nahi hai chashm-e-inayat Huzoor ﷺ ki

Aankhein na hon to khaak nazar aaye aaftab Siddique jaante hain sadaqat Huzoor ﷺ ki

Meri nazar mein murshid-e-kamil hai woh bashar Tafweez kar sake jo mohabbat Huzoor ﷺ ki

Anjum misaal-e-naqsh-e-qadam ja-ba-ja mile Le kar kahan chali hai mohabbat Huzoor ﷺ ki

Find Your Favorite Lyrics Anytime, Anywhere - Install the App Today!

Main hoon zaban-e-maah-o-surayya se aashna Hai kainat-e-dahr hikayat Huzoor ﷺ ki

Aahista saans le ke khilaf-e-adab na ho Hai aaina ki tarah tabiyat Huzoor ﷺ ki

Aankhon ko apni choomta rakh rakh ke aaina Hoti agar naseeb ziyarat Huzoor ﷺ ki

Chashm-e-talab mein kis ka ujala? Huzoor ﷺ ka Duniya-e-dil mein kis ki hukumat? Huzoor ﷺ ki

Danish mein khauf-e-marg se mutlaq hoon be-niyaz Main jaanta hoon maut hai sunnat Huzoor ﷺ ki