Afzal Hai Mursalon Mein Rasalat

افضل ہے مرسلوں میں رسالت حضورؐ کی اکمل ہے انبیاء میں نبوت حضورؐ کی

ہے ذرہ ذرہ اُن کی تجلی کا اک سراغ آتی ہے پھول پھول سے نکہت حضورؐ کی

پہچان لیں گے آپ وہ اپنوں کو حشر میں غافل نہیں ہے چشمِ عنایت حضورؐ کی

آنکھیں نہ ہوں تو خاک نظر آۓ آفتاب صدیق جانتے ہیں صداقت حضورؐ کی

میری نظر میں مرشدِ کامل ہے وہ بشر تفویض کر سکے جو محبت حضورؐ کی

انجم مثالِ نقشِ قدم جا بجا ملے لے کر کہاں چلی ہے محبت حضورؐ کی

میں ہوں زبانِ ماہ و ثریا سے آشنا ہے کائناتِ دہر حکایت حضورؐ کی

آہستہ سانس لے کہ خلافِ ادب نہ ہو ہے آئینہ کی طرح طبیعت حضورؐ کی

آنکھوں کو اپنی چومتا رکھ رکھ کے آئینہ ہوتی اگر نصیب زیارت حضورؐ کی

چشمِ طلب میں کس کا اجالا؟ حضورؐ کا دنیاۓ دل میں کس کی حکومت؟ حضورؐ کی

دانش میں خوفِ مرگ سے مطلق ہوں بے نیاز میں جانتا ہوں موت ہے سنت حضورؐ کی