Aap Ka Sadqa Hai

Aap ka sadqa hai dunya, zindagi hai aap se Wusat-e-kon-o-makaan mein roshni hai aap se Aap ne rakhi hai aab-o-gil pe bunyad-e-hayat Ibtida-e-alam-e-imkan hui hai aap se

Aap hi taqseem karte hain farasat ke nujoom Aql-e-insani hidayat maangti hai aap se

Aap ne roshan kiye hain adamiyat ke charagh Har zamane mein waqar-e-aadmi hai aap se

Mera husn-e-bandagi hai aap ki seerat ka faiz Mere sajdon mein khuloos-e-bandagi hai aap se

Download Lyrics & Access Offline - Install Our App Now!

Aap se leta hai suraj bhi mata-e-roshni Chand ke be-hiss badan mein dilkashi hai aap se

Jab bhi satah-e-aab se uthti hai rehmat ki ghata Kaun se khitte pe barsoon, poochti hai aap se

Ab to Ashar ko talab kar leeje shehar-e-noor mein Is faqeer-e-reh-guzar ki lau lagi hai aap se