Ya Shaheed e Karbala Faryad Hai

Ya Shaheed-e-Karbala faryaad hai Noor-e-chashm-e-Fatimah faryaad hai

Aah! Sibt-e-Mustafa faryaad hai Haaye! Ibn-e-Murtaza faryaad hai

Bera amwaj-e-talatum mein phansa Aah! mere nakhuda faryaad hai

Us Ali Akbar ka sadqa jo ke hain Hum shabih-e-Mustafa faryaad hai

Hai meri haajat mein Taibah mein maroon Ae mere haajat rawa faryaad hai

Mujh ko deewana Madine ka bana Noor-e-chashm-e-Mustafa faryaad hai

Saqi-e-Kausar ka sadqa saqiya Jaam-e-ulfat ka pila faryaad hai

Dushmanon ki dushmani se tang hoon Shahsawar-e-Karbala faryaad hai

Hasidon ka barh gaya had se hasad Aur sulook-e-narawa faryaad hai

Thartharata hai kaleja khauf se Door ho khauf aa bhi ja faryaad hai

Raaste hi mein bhatak kar reh gaya Rehbari kar rehnuma faryaad hai

De diya saare tabibon ne jawab Bahr-e-Zahra de shifa faryaad hai

Main nikkama hoon nikamme ko nibha Kaun hai tere siwa faryaad hai

Find Your Favorite Lyrics Anytime, Anywhere - Install the App Today!

Nafs-o-shaitan ki pakar mein aa gaya Zor-e-isiyan barh chala faryaad hai

De Ali Asghar ka sadqa sarwara Paikar-e-jood-o-sakha faryaad hai

Jankani mein sakhtiyon par sakhtiyan Barh rahi hain Sayyida faryaad hai

Paar utaar ae rakib-e-dosh-e-Nabi Bahr-e-gham se nakhuda faryaad hai

Bewafa duniya ki ulfat door ho Paikar-e-sidq-o-wafa faryaad hai

Bahr-e-Zainab behayaai ka huzoor Khatima ho khatima faryaad hai

Ya Hussain Islami behnon ko bana Paikar-e-sharm-o-haya faryaad hai

Har taraf se hai balaon ka hujoom Dafe-e-karb-o-bala faryaad hai

Sabr ka paimana ab labrez hai Paikar-e-sabr-o-raza faryaad hai

Muflis-o-nachar-o-khasta haal hoon Makhzan-e-jood-o-ata faryaad hai

Chha gayi dil par khizan pyare Hussain! De bahar-e-janfiza faryaad hai

Hubb-e-Sadat ae Khuda de wasita Ahl-e-Bait-e-pak ka faryaad hai

Aafton par aaften hain al-madad Sayyid-o-sardar-e-ma faryaad hai

Deen ki khidmat ka jazba dijiye Sadqa nana jaan ka faryaad hai

Sunnaton ki har taraf aaye bahar Sadqa mere Ghous ka faryaad hai

Chal gayi baad-e-mukhalif al-ghiyas Ae Hussain-e-bawafa faryaad hai

Kaash! ho jaaun Madine mein shaheed Aap farma dein dua faryaad hai

Bakht ki hain jis qadar bhi guthiyan Saari suljha do shaha faryaad hai

Karbala ki haziri ho phir naseeb Bakht-e-khwabida jaga faryaad hai

Haal hai behaal Shah-e-Karbala Aap ke Attarؔ ka faryaad hai