Ya Rab Phir Auj Par Yeh Humara Naseeb Ho

Ya-Rab phir auj par yeh hamara naseeb ho Su-e-Madinah phir hamein jaana naseeb ho

Stop Wasting Storage - Download Lyrics in Lightweight Text Format!

Makkah bhi ho naseeb Madinah naseeb ho Dasht-e-Arab naseeb ho sahra naseeb ho

Hajj ka safar phir ae mere Maula naseeb ho Arafat ka Mina ka nazara naseeb ho

Allah! deed-e-Gumbad-e-Khazra naseeb ho Ya-Rab! Rasool-e-Pak ka jalwa naseeb ho

Choomon Arab ki wadiyan ae kaash! ja ke phir Sahra mein un ke ghoomna phirna naseeb ho

Ka'abay ke jalwon se dil-e-muztar ho kaash! shaad Lutf-e-tawaf-e-khanah-e-Ka'aba naseeb ho

Makkah mein un ki ja-e-wiladat pe Ya-Khuda Phir chashm-e-ashkbar jamana naseeb ho

Kis tarah shauq se wahan karte thay hum tawaf Phir gird-e-Ka'aba jhoom ke phirna naseeb ho

Hum ja ke khoob lotain Madinay ki dhool par Aankhon mein khak-e-Taibah lagana naseeb ho

Sad aafreen! Gumbad-e-Khazra ki tabishein Jalwon mein us ke khud ko gumana naseeb ho

Waan chalchalati dhoop ka bhi ik suroor hai Jootay utaar kar wahan chalna naseeb ho

Namnak aankh Gumbad-e-Khazra ko choom le Jhuk jaaye phir adab se woh lamha naseeb ho

Kardon main kaash! ja jaliyon par apni jaan fida Rauzay ka un ke jis ghari jalwa naseeb ho

Mihrab-o-mimbar aur woh hariyali jaaliyan Aur Masjid-e-Habib ka jalwa naseeb ho

Jannat ki pyari kyari ki theen khoob raunaqein Phir baithna wahan pe Khudaya naseeb ho

Chup chup ke dekhon mimbar-e-aqdas ki phir bahaar Shayad kabhi to Shah ka jalwa naseeb ho

Hijr-e-Rasool mein hamein Ya-Rabb-e-Mustafa Ae kaash! phoot phoot ke rona naseeb ho

Attar ki ho haziri har saal Ya-Khuda Aakhir ko Taibah mein usay marna naseeb ho