Ya Rab Phir Auj Par Yeh Humara Naseeb Ho

یارب پھر اَوج پر یہ ہمارا نصیب ہو سُوئے مدینہ پھر ہمیں جانا نصیب ہو

مکّہ بھی ہو نصیب مدینہ نصیب ہو دشتِ عَرَب نصیب ہو صَحرا نصیب ہو

حج کا سفر پھر اے مِر ے مولیٰ نصیب ہو عَرفات کا مِنٰی کا نظارہ نصیب ہو

اللہ! دیدِ گنبد خضرا نصیب ہو یارب! رسولِ پاک کا جلوہ نصیب ہو

چوموں عرب کی وادیاں اے کاش! جا کے پھر صَحرا میں اُن کے گھومنا پھرنا نصیب ہو

کعبے کے جلووں سے دلِ مُضطَر ہو کاش! شاد لُطفِ طوافِ خانۂ کعبہ نصیب ہو

مکّے میں ان کی جائے وِلادت پہ یاخدا پھر چشمِ اشکبار جمانا نصیب ہو

کس طرح شوق سے وہاں کرتے تھے ہم طواف پھر گِردِ کعبہ جھوم کے پھرنا نصیب ہو

ہم جا کے خوب لَو ٹیں مدینے کی دھول پر آنکھوں میں خاکِ طیبہ لگانا نصیب ہو

صد آفرین! گنبد خَضرا کی تابِشَیں جلووں میں اس کے خود کو گُمانا نصیب ہو

واں چلچلاتی دھوپ کا بھی اِک سُرور ہے جوتے اُتار کر وہاں چلنا نصیب ہو

نَمناک آنکھ گنبدِ خضرا کو چوم لے جُھک جا ئے پھر ادب سے وہ لمحہ نصیب ہو

کردوں میں کاش ! جا لیوں پر اپنی جاں فِدا رَوضے کا ان کے جس گھڑی جلوہ نصیب ہو

مِحراب و مِنبر اور وہ ہریالی جالیاں اور مسجِدِ حبیب کا جلوہ نصیب ہو

جنَّت کی پیاری کیاری کی تھیں خوب رَونقیں پھر بیٹھنا وہاں پہ خُدایا نصیب ہو

چُھپ چُھپ کے دیکھوں منبرِاقدس کی پھر بہار شاید کبھی تو شاہ کا جلوہ نصیب ہو

ہِجرِ رسول میں ہمیں یاربِّ مصطَفٰے اے کاش! پھو ٹ پھوٹ کے رونا نصیب ہو

عطارؔ کی ہو حاضِری ہر سال یا خدا آخِر کو طیبہ میں اسے مرنا نصیب ہو