Sar Gasht e Gham Kahun

Sarguzasht-e-gham kahoon kis se tere hote hue Kis ke dar par jaaun tera aastana chhod kar

Be-liqaye yaar un ko chain aa jata agar Baar baar aate na yun Jibreel Sidrah chhod kar

Kaun kehta hai dil-e-be-mudda hai khoob cheez Main to kodi ko na loon un ki tamanna chhod kar

Mar hi jaaun main agar us dar se jaaun do qadam Kya bache bimar-e-gham qurb-e-Masiha chhod kar

Kis tamanna par jiyen ya Rab aseeran-e-qafas Aa chuki baad-e-saba baagh-e-Madinah chhod kar

Bakhshwana mujh se aasi ka rawa hoga kise Kis ke daaman mein chhupon daaman tumhara chhod kar

Khuld kaisa nafs-e-sarkash jaunga Taibah ko main Bad-chalan hat kar khada ho mujh se rasta chhod kar

Aise jalwe par karoon main laakh hooron ko nisaar Kya garaz kyun jaaun jannat ko Madinah chhod kar

Find Your Favorite Lyrics Anytime, Anywhere - Install the App Today!

Hashr mein ek ek ka munh takte phirte hain adu Aafton mein phans gaye un ka sahara chhod kar

Mar ke jeete hain jo un ke dar pe jaate hain Hasan Jee ke marte hain jo aate hain Madinah chhod kar