Pohanchun Madine Kash

Pahunchun Madine kaash! main is be-khudi ke sath Rota phiroon gali gali deewangi ke sath

Aate hain mujhko yaad woh lamhat-e-khushgawar Guzre thay Taibah mein jo kabhi murshidi ke sath

Joon hi nigah Gumbad-e-Khazra ko choom le Qurban meri jaan ho khud-raftagi ke sath

Mujhko Baqi-e-Pak mein do gaz zameen mile Yarab! dua hai tujh se meri aajizi ke sath

Allah! mera hashr ho Abubakar aur Umar Usman-e-Ghani wa Hazrat-e-Mola Ali ke sath

Never Be Without Your Favorite Lyrics - Get the App for Offline Access!

Palte ga pak ho ke dar-e-Mustafa se woh Pahuncha ho jo gunahon ki aaloodagi ke sath

Har ik gunahgar pukare ga hashr mein Aaqa ko ashkbar bari be-basi ke sath

Mahshar mein mujhko joon hi nazar aayenge Huzoor Qadmon mein lot jaaun ga waraftagi ke sath

Yarab! tere karam se jagah khuld mein mile Mujhko Rasool-e-Pak ki hamsayagi ke sath

Woh yaar-e-ghaar bhi hain toh yaar-e-mazaar bhi Abubakar aaj bhi toh hain har dam Nabi ke sath

Roti bhi jau ki aur bichhona chatai ka Karte guzar basar woh bari saadagi ke sath

Faizan-e-Ghaus-e-Pak bila-raib sab ke sab Attariyon ke sath hai har Qadri ke sath

Aisa karam ho nekiyon mein dil laga kare Parhta hoon gar namaz bhi toh be-dili ke sath

Ae Zuljalal tujh se mere do sawal hain Taibah mein maut, zindagi guzre khushi ke sath

Ik baar muskura ke mujhe dekh lijiye Dam tor doon ga qadmon mein waraftagi ke sath

Mayoos kyun ho aasiyo! tum hausala rakho Rabb ki ata se unka karam hai sabhi ke sath

Khutba, azaan, namaz, ibadat koi si ho Zikr-e-Nabi zaroor hai har bandagi ke sath

Tum Madani qafilon mein ae Islami bhaiyo! Karte raho hamesha safar khush-dili ke sath

Apnaye jo sada ke liye ’’Sunnat-e-Nabwi‘‘ Meri dua hai khuld mein jaye Nabi ke sath

Islami bhai, ’’Dawat-e-Islami‘‘ ka sada Tum Madani kaam karte raho tandahi ke sath

Sarkar haziri ho Madine ki baar baar Attar ki hai arz bari aajizi ke sath