Hai Kabhi Durood o Salaam

Hai kabhi durood-o-salam to, kabhi naat lab pe saji rahi Gham-e-hijr mein kabhi ro para, kabhi haziri ki khushi rahi

Teri aankh mein jo nami rahi, kali tere dil ki khili rahi Kabhi dil mein hook uthi rahi, to nigah teri jhuki rahi

Mujhe karde deedah-e-tar ata, gham-e-ishq soz-e-jigar ata Ho Baqi-e-Pak mein ja ata, yahi aarzoo-e-dili rahi

Your Lyrics, Even Offline - Install the App for Free!

Na kaseer maal ki aarzoo, na hi iqtidaar ki justujoo Main to sail-e-gham-e-ishq hoon, mere aage hech shahi rahi

Jise mil gaya gham-e-Mustafa, use zindagi ka maza mila Kabhi sail-e-ashk rawan hua, kabhi "aah" dil mein dabi rahi

Yeh hai zindagi koi zindagi, na namaz hai na hi bandagi Yahi hubb-e-jaah ki gandagi, teri kyun nazar mein basi rahi

Jo Nabi ki yaad mein kho gaya, woh Khuda-e-Pak ka ho gaya Do jahan uske sanwar gaye, use aakhirat mein khushi rahi

Mujhe Ya Nabi! teri deed ho, teri deed ho meri eid ho Tujhe jisne dekha hazar baar! use phir bhi tishna labi rahi

Na pasand aayen chaman use, na hi khet bhayen hare bhare Jo nigah mein hai basi rahi, to Madine hi ki gali rahi

Mujhe ab Madine mein lo bula, isi saal hajj bhi karoon shaha Ho karam paye Shah-e-Karbala, yahi iltija Madani rahi

Meri jaan ho jism se jab juda, ho nazar mein jalwah-e-Mustafa Ho Madine mein mera khatimah, yeh dua Khuda-e-Ghani rahi

Madani! gunah ki aadaten, nahin jaatin, aap hi kuch karen Main ne koshishen keen bahut magar, meri halat aah! buri rahi

Mujhe shauq-e-deen shab-o-roz de, yahi walwala yahi soz de Teri sunnaten karoon aam main, keh isi mein teri khushi rahi

Tu sag-e-Madinah ko Ya Khuda, gham-e-rozgar se le bacha De gham-e-Madinah paye Raza, yahi bas dua-e-dili rahi