Tenu Teri Kareemi Da Wasta E

کرم کردے ربّا کرم دا ہے ویلا تینوں تیری کریمی دا واسطہ ای تیرے ناں دا ذکر میں رہواں کردا تینوں تیری رحیمی دا واسطہ ای عشق رسول وچ کردے مست مینوں تینوں تیری قدیمی دا واسطہ ای تڑفدا رہواں سوہنے دی یاد اندر تینوں اوہدی یتیمی دا واسطہ ای

جس دے وچ جلوہ ریز ہویوں اوس آئینے دا واسطہ ای جو بچایا محبوب دے صدقے اوس نوجی سفینے دا واسطہ ای جس ماہِ مبارک وچ آیا سوہنا تینوں اوس مہینے دا واسطہ ای دے دے موت مدینے دےوچ مولا تینوں شہر مدینے دا واسطہ ای

تینوں مُہرِ نبوت دا واسطہ ای ہراک نبی تے ولی دا واسطہ ای اہل بیت دے چمن دے یا مولا ہر پھل تے کلی دا واسطہ ای ساڈیاں سب خطاواں نوں بخش مولا تینوں زہراتے علی دا واسطہ ای

عیباں والیاں دے ربا عیب کج لئیں تینوں تیری سٗتاری دا واسطہ ای معاف کردے سارے قصور ساڈے تینوں شان غفّاری دا واسطہ ای نالے بدلیں تقدیراں توں ساڈیاں نوں تینوں کُل مختاری دا واسطہ ای نال اُنگلی دے جنھے چن توڑا اوہدی شان پیاری دا واسطہ ای جنھے غار وچ ڈنگ کھاہدے اوہدی جان پیاری دا واسطہ ای صدقہ عمر عثمان تے علی حیدر، ابوذرغفاری دا واسطہ ای تینوں حضرت اویس دا واسطہ ای نالے فاطمہ پیاری دا واسطہ ای جنھے نیزے تے چڑھ قرآن پڑھیا اوس کربل دے قاری دا واسطہ ای حشر وچ ساڈاتوں بھرم رکھ لئیں تینوں یار دی یاری دا واسطہ ای

گناہگارنوں بخش دیئیں یا مولا تینوں سوہنیاں نانواں دا واسطہ ای جہڑیاں وگن مدینے دے باغ اندر اوہناں سرد ہواواں دا واسطہ ای طیبہ والے نے جتھے سجائی رونق اوہناں سوہنیاں تھاواں دا واسطہ ای ہن تے سانوں وی درتے بُلا آقا سبز گنبددیاں چھاواں دا واسطہ ای

پریشانیاں ساڈیاں توں دور کردے تینوں شانِ ذی شان دا واسطہ ای لامکان تے جو مہمان ہویا اوہدے آن تے جان دا واسطہ ای تپدی ریت تے جنھے پڑھیا کلمہ اوہدے کلمے سنان دا واسطہ ای پڑھدا رہواں روز بروز میں وی شاناں والے قرآن دا واسطہ ای