Pur Kaif Kis Qadar

پرکیف کس قدر غمِ پنہاں ہے اے حضورؐ میرا یہی دفینہء ایماں ہے اے حضورؐ

ہم آپؐ کے مقام کو سمجھے نہیں، بجا! اپنے وجود کا ہی کب عرفاں ہے اے حضورؐ

اُمت پہ کتنی آج گراں ہو گئی حیات ارزاں بہت ہی خونِ مسلماں ہےاے حضورؐ

شیرازہ بند شوق ہے تیری نگاہ لطف شیرازۃ خیال پریشاں ہے اے حضورؐ

احسان و عدل و امن کے نعروں کے باوجود تہذیب ساری جنگ کا میداں ہے اے حضورؐ

مجروح کتنی غیرتِ آدم ہے آج کل مظلوم کتنی عظمتِ انساں ہےاے حضورؐ

کس شان سے ہوا دلِ عاشق لہولہان جیسے یہ کوئی لعلِ بدخشاں ہےاے حضورؐ

لاشے تڑپ رہے ہیں سرِ دارِ و زیر تیغ کیا ہر طرف یہ حشر کا ساماں ہےاے حضورؐ

کچلے ہوۓ سے کیوں ہیں خیالاتِ عرش گیر سہا ہوا سا کیوں مرا ایماں ہے اے حضورؐ