Mujhe Har Saal Tum

مجھے ہر سال تم حج پر بلانا یارسولَ اللہ بُلانا اور مدینہ بھی دکھانا یارسولَ اللہ

رہے ہر سال میرا آنا جانا یارسولَ اللہ بقیعِ پاک ہو آخِر ٹِھکانا یارسولَ اللہ

مِری آنکھوں میں تم ہر دم سمانا یارسولَ اللہ دلِ ویراں کو جلووں سے بسانا یارسولَ اللہ

نہ دولت دو نہ دو کوئی خزانہ یارسولَ اللہ سکھا دو عشق میں رونا رُلانا یارسولَ اللہ

نظر بھر کر شہا! میں دیکھ لوں پھر گنبدِ خضرا خُدارا پھر سبب کوئی بنانا یارسولَ اللہ

دوا کے واسِطے بیمارِ عِصیاں در پہ حاضِر ہے نہ تم مایوس اِسے در سے پِھرانا یارسولَ اللہ

نُقُوشِ الفتِ دنیا مرے دل سے مٹا دینا مجھے اپنا ہی دیوانہ بنانا یارسولَ اللہ

سلیقہ آپ کی یادوں میں رونے کا تڑپنے کا پئے غوث و رضا مجھ کو سکھانا یارسولَ اللہ

پئے غو ثُ الوَرا، احمد رضا، مرشد ضِیاء الدین عطا ہو عشق و مستی کا خزانہ یارسولَ اللہ

فِرِشتہ موت کا اب آچکا ہے رُوح لینے کو سَرِ بالیں ذرا جلدی سے آنا یارسولَ اللہ

کُھلے ہیں دفترِ اعمال! ہائے! میرا کیا ہوگا! بچانا شافِعِ محشر بچانا یارسولَ اللہ

یہ گندا ہے نِکمّا ہے یہ جیسا ہے تمہارا ہے تمہیں عطارِؔ عاصی کو نبھانا یارسولَ اللہ