Josh Par Tazkara e Shah

جوش پر تذکرۂ شاہِ انام آتا ہے چاندنی پھیلتی ہے ماہِ تمام آتا ہے دور میں رحمتِ غفار کا جام آتا ہے

جس جگہ احمدِ مختار کا نام آتا ہے وہیں جبریلِ امیں لے کے سلام آتا ہے

بیٹھتے اٹھتے زباں پر وہی نام آتا ہے لطفِ مے آتا ہے بے شیشہ و جام آتا ہے لبِ خاموش کو بھی طرزِ کلام آتا ہے

عشقِ خواجہ میں اک ایسا بھی مقام آتا ہے دل دھڑکتا ہے تو رحمت کا پیام آتا ہے

سوئے طیبہ ہے رواں قافلۂ شوق و نیاز کوئی ہمدم ہے نہ رہبر ہے نہ کوئی دمساز ہر قدم پر ہے تصور میں حریمِ صد ناز

آپ کے حکم سے بے پر کو ملی ہے پرواز اذن بخشا ہے تو سرکار غلام آتا ہے

حکمِ لا ترفعوا اصوات کا پہرہ ہے ادھر ایک لمحے کی بھی غفلت ہے یہاں غارت گر دھڑکنیں زیر و زبر ہوں نہ انہیں قابو کر

دلِ بے تاب ٹھہر اے دلِ بے تاب ٹھہر با ادب باش کہ طیبہ کا مقام آتا ہے

کیا تعجب ہے کہ ہم جیسے کمینے پہنچیں جب ہمیں خود لیے رحمت کے سفینے پہنچیں چند سانسوں کی ہے رخصت، انہیں جینے پہنچیں

اے دل اب وقت ہے پیری کا مدینے پہنچیں آشیانے میں پرندہ سرِ شام آتا ہے

شانِ حق کا ہوا اظہار بہ شانِ محبوب اور قرآں نے قسم کھائی بہ جانِ محبوب عین منشائے مشیت ہے بیانِ محبوب

ترجمانِ دلِ یزداں ہے زبانِ محبوب وحی بن کر لبِ حضرت پہ کلام آتا ہے

انبیا مثلِ کواکب ہیں تو وہ ماہِ تمام اول الخلق کا رکھتے ہیں بصد فخر مقام خاتمیت کا بھی حق نے انہیں بخشا انعام

بعثتِ خواجہ ہوئی بعدِ رسولانِ کرام صفیں ہو جائیں مکمل تو امام آتا ہے

قلبِ مضطر کو یہیں دیکھا ہے تسکین پذیر اس سے مانوس رہے جن و ملک سب کے خمیر طبعِ مشتاق کو بھاتی ہے یہی اک زنجیر

ایک میں ہی نہیں گیسوئے محمد کا اسیر طائرِ سدرہ بھی اڑ کر تہِ دام آتا ہے

ان کی رحمت کے نشاں عرشِ علا فرشِ زمیں عام ہے ان کا کرم سب پہ، رہے کوئی کہیں فیضیاب ان سے ہے فاضل یہ مرا حرفِ یقیں

رومی و جامی و سعدی ہی پہ موقوف نہیں ان کے مداحوں میں مظہر کا بھی نام آتا ہے