We've added ads to help keep the platform running and improving for you. Learn More
جہاں پیوندِ ظلمت بن گۓ روزن مکانوں کے وہیں کھولے گۓ سارے دریچے آسماںوں کے
اک اندھی رات تھی جو ریت پر لہریں بناتی تھی اور ان میں جذب ہوجاتے تھے نغمے ساربانوں کے
سراۓ دہر میں مہمان تھےصدیوں کے سناٹے تمہارا نام لے کر کارواں اترے اذانوں کے
تمہاری رہ گزر میں کوئی جتنی دور جاتا ہے اسی نسبت سے دل پر بھید کھلتے ہیں جہانوں کے
مخالف سمت جائیں تو سفینے ٹوٹ جاتے ہیں مدینے کی طرف رخ پھر رہے ہیں بادبانوں کے
کتابِ زندگی رکھتے ہیں تابِ زندگی کم ہے نۓ کردار ہیں ہم لوگ اگلی داستانوں کے
