Ho Madine Ka Ticket

ہو مدینے کا ٹِکَٹ مجھ کو عطا داتا پیا آپ کو خواجہ پِیا کا واسِطہ داتا پیا

مجھ کو رَمضانِ مدینہ کی زیارت ہو نصیب خرچ ہو راہِ مدینہ کا عطا داتا پیا

دو نہ دو مرضی تمہاری تم مدینے کا ٹِکَٹ میں پکارے جاؤں گا داتا پِیا داتا پیا

دولتِ دنیا کا سائل بن کے میں آیا نہیں مجھ کو دیوانہ مدینے کا بنا داتا پیا

کاش میں رویا کروں عشقِ رسولِ پاک میں سوز دو ایسا پئے احمد رضا داتا پیا

غم مجھے میٹھے مدینے کا عطا کر دو شہا میرا سینہ بھی مدینہ دو بنا داتا پیا

میٹھے میٹھے مصطَفٰے کی بارگاہِ پاک میں کیجئے میری سِفارش آپ یا داتا پیا

گو ذلیل وخوار ہوں پاپی ہوں میں بدکار ہوں آپ کا ہوں آپ کا ہوں آپ کا داتا پیا

آرزو ہے موت آئے گنبدِ خَضرا تلے ہاتھ اٹھا کر کیجئے حق سے دعا داتا پیا

میں ہوں عصیاں کا مریض اور تم طبیبِ عاصِیاں ہو عطا مجھ کو گناہوں کی دوا داتا پیا

آپ کی چشمِ کرم ہو جائے گر بدحال پر دُور ہو غم کی ابھی کالی گھٹا داتا پیا

کیا غَرَض دردر پھروں میں بھیک لینے کیلئے ہے سلامت آستانہ آپ کا داتا پیا

جھو لیاں بھر بھر کے لے جا تے ہیں منگتے رات دن ہو مِری اُمّید کا گلشن ہرا داتا پیا

مجھ کو داتا تاجدارانِ جہاں سے کیا غَرَض میں تو ہوں منگتا ترے دربار کا داتا پیا

اُجڑے گھر آباد ہوں اور غم کے مارے شادہوں ہو ترے ہر ایک منگتے کا بھلا داتا پیا

دُم دبا کر بھا گ جائے شَیر بھی گر دیکھ لے آپ کے دربار کا کُتّا شہا داتا پیا

کا ش! پھر لاہور میں نیکی کی دعوت عام ہو فیض کا دریا بہا دو سرورا داتا پیا

مسجِدیں آباد ہوں اور سنّتیں بھی عام ہوں! فیض کا دریا بہا دو سرورا داتا پیا

سارے منگتے اپنے چِہرے پر سجا ئیں داڑھیاں فیض کا دریا بہا دو سرورا داتا پیا

تختِ شاہی کی نہیں ہے آرزو عطارؔ کو اِس کو بس کُتّا بنالو اپنا یا داتا پیا