Har Dam Ho Mera Wird Madina

ہر دَم ہو مِرا وِرد مدینہ ہی مدینہ بن جائے مِرا دل تری الفت کا خزینہ

وہ لَمحہ وہ دِن اَور وہ آجَائے مہینا پھر کاش! تڑپتا ہُوا پہنچوں میں مدینہ

طیبہ میں بُلا کر مُجھے سلطانِ مدینہ دیدار کی خاطِر ہو عَطا آنکھ بھی بِینا

سینہ ہو مدینہ تو مدینہ بنے سینہ اور یاد تری دل میں رہے شاہِ مدینہ

آجَائے مُجھے کاش! شَہَنشاہِ مدینہ رَونے کا تڑپنے کا پَھڑکنے کا قَرینہ

Stop Wasting Storage - Download Lyrics in Lightweight Text Format!

عِصیاں کے تَلاطُم میں پھنسا میرا سفینہ ڈوبا میں سنبھالو! مُجھے سرکارِ مدینہ

اے نُورِ خُدا نُور بَھری دِل پہ نَظر ہو ہو نُور سے پُرنُور یہ بے نُور نگینہ

سرکار! تمنّا ہے یُونہی عُمر بَسر ہو مرنا تری الفت میں تری یاد میں جینا

غمگین تِرے غم میں رہُوں کاش ! ہمیشہ روتی رہیں آنکھیں تو سُلگتا رہے سینہ

ساقی! مُجھے جَام ایسا محبت کا پِلادو اُترے نہ نشہ اس کا کبھی شاہِ مدینہ

تُم خاکِ مدینہ مِرے لاشے پہ چھڑکنا پھر مَلنا کفن پر جو ملے اُن کا پسینہ

عطّارؔ طلبگار ہے بس نظرِ کرم کا لِلّٰہ کرم، جانِ کرم، بہرِ مدینہ