Agar Kamli Wale Ki Rehmat Na Hoti

اگر کملی والے کی رحمت نہ ہوتی تو قسمت کے ماروں کا کیا حال ہوتا رسول خدا کا سہارا نہ ملتا توہم بے سہاروں کا کیا حال ہوتا

وہ آقا وہ مولا وہ داتا ہمارے خدائی کے پیارے خدا کے دُلارے محمدﷺ جو دکھیوں کے حامی نہ ہوتے تو اِن بے قراروں کا کیا حال ہوتا

نہ یہ پھول کھلتے نہ کلیاں مہکتیں نہ گلزار ہنستے نہ گلیاں مہکتیں نبی کے پسینے کی خوشبو نہ ملتی تو دلکش بہاروں کا کیا حال ہوتا

محمد ﷺ کا جلوہ ہے جلوہ خدا کا محمد ﷺ کا پردہ ہے پردہ خدا کا اگر آپ آ جاتے پردے سے باہر تو پھر چاند تاروں کا کیا حال ہوتا

کسے حال دل اپنا انورؔ سناتے کہاں پھر اماں اہلِ توحید پاتے اگر سبز گنبد کا سایا نہ ملتا تو الفت کے ماروں کا کیا حال ہوتا