Ya Ali Al Murtaza Moula Ali

یا علیَّ المرتَضیٰ مولیٰ علی مشکلکُشا آپ ہیں شیرِ خدا مولیٰ علی مشکلکُشا

صاحِبِ لُطف و عطا مولیٰ علی مشکلکُشا ہیں شہیدِ با وفا مولیٰ علی مشکلکُشا

علم کا میں شہر ہوں دروازہ اِس کا ہیں علی ہے یہ قَولِ مصطَفٰے مولیٰ علی مشکلکُشا

جس کسی کا میں ہوں مولیٰ اُس کے مولیٰ ہیں علی ہے یہ قولِ مصطَفٰے مولیٰ علی مشکلکُشا

پیکرِ خوفِ خدا اے عاشقِ خیرُ الورٰی تم سے راضی کبریامولیٰ علی مشکلکُشا

بعدِ خُلفائے ثَلاثہ سب صَحابہ سے بڑا آپ کو رُتبہ ملا مولیٰ علی مشکلکُشا

قَلعۂ خیبر کا دروازہ اُکھاڑا آپ نے مرحبا! صد مرحبا! مولیٰ علی مشکلکُشا

پیکرِ جُودو سخا تُو میں فقیر وبے نوا تو ہے داتا میں گدا مولیٰ علی مشکلکُشا

شَبَّر و شَبّیر کے والد ہوتم ماں فاطِمہ سیِّد و سردارِ ما مولیٰ علی مشکلکُشا

میں گناہوں کا مریض اور آپ ہیں میرے طبیب دیجئے مجھ کو شِفا مولیٰ علی مشکلکُشا

جان کو خطرہ ہے میری دشمنوں سے ہر گھڑی المدد شیرِ خدا مولیٰ علی مشکلکُشا

حیدرِ کرّار! لے کے آؤ تیغِ ذُوالفِقار زورِ دشمن بڑھ چلا مولیٰ علی مشکلکُشا

مغفِرت کروایئے جنت میں لے کے جایئے واسِطہ حَسنَین کا مولیٰ علی مشکلکُشا

دل سے دنیا کی مَحبَّت دُور کر کے یا علی! دیدو عشقِ مصطَفٰے مولیٰ علی مشکلکُشا

از پئے غوثُ الورا ہم کو نَجف بُلوایئے ہو کرم یا مُرتَضیٰ مولیٰ علی مشکلکُشا

شَبَّرو شبِّیر کے بابا مجھے دیدار ہو خواب میں اب آپکا مولیٰ علی مشکلکُشا

اشکبار آنکھیں عطا ہوں دل کی سختی دور ہو دیجئے خوفِ خدا مولیٰ علی مشکلکُشا

ایک ذرّہ اپنی اُلفت کا عنایت کر مجھے اپنا دیوانہ بنا مولیٰ علی مشکلکُشا

بھیک لینے کیلئے دربار میں منگتا ترا لے کے کشکول آ گیا مولیٰ علی مشکلکُشا

کیوں پھروں در در بھلا خیرات لینے کیلئے میں فقط منگتا تِرا مولیٰ علی مشکلکُشا

نفسِ اَمّارہ ہو مغلوب اور سدا ناکام ہو وار ہر شیطان کا مولیٰ علی مشکلکُشا

بے سبب بخشش ہو میری یہ دعا فرمایئے مصطَفٰے کا واسِطہ مولیٰ علی مشکلکُشا

کیجئے حق سے دعا ایمان پر ہو خاتمہ خیر سے عطّارؔ کا مولیٰ علی مشکلکُشا