Phir Bula Karbala

پھر بُلا کربلا، یاشہِ کربلا اپنا روضہ دکھا، یاشہِ کربلا

تیرے دربار کو، اس کے انوار کو آہ! کب پاؤں گا، یاشہِ کربلا

میں نے چُومی نہیں ‘ کربلا کی زمیں ایک عرصہ ہوا، یاشہِ کربلا

کوچۂ پاک کو، خَس کو خاشاک کو چوموں آکر شہا، یاشہِ کربلا

ایسا پاؤں جُنُوں،دھڑکنوں میں سُنوں کربلا کربلا، یاشہِ کربلا

ازپئے چار یار، اے شہِ ذی وقار اپنا شیدا بنا، یاشہِ کربلا

چشمِ نم دیجئے اپنا غم دیجئے از طفیلِ رضا، یاشہِ کربلا

خواب میں آئیے، جلوہ دکھلائیے ازپئے مصطَفٰے، یاشہِ کربلا

اس گنہگار کو، خوار و بدکار کو جیسا بھی ہے نبھا، یاشہِ کربلا

ابنِ شاہِ عرب!مرضِ عِصیاں سے اب دیدو مجھ کو شفا، یاشہِ کربلا

ایک مظلوم کو اپنے مغموم کو آفتوں سے چھُڑا، یاشہِ کربلا

میرے اُجڑے چمن پر کرم کی بھَرَن اب تو برسا شَہا، یاشہِ کربلا

دل کو مل جائے چَین المدد یاحُسین ہوں بَہُت غمزدہ، یاشہِ کربلا

اب ہو رخصت خَزاں ،کھِل اُٹھے گُلْ سِتاں وہ چلا دو ہوا، یاشہِ کربلا

ذُوالفقارِ علی، جب عَدُو پر چلی قَہر سا چھا گیا، یاشہِ کربلا

آہ!دشمن مرے،خوں کے پیاسے ہوئے لیکے تلوار آ، یاشہِ کربلا

سن لو فریاد کو آؤ امداد کو ابنِ مُشکلکشا، یاشہِ کربلا

ہو مُیَسَّر امام اب شہادت کا جام کردو حق سے دُعا، یاشہِ کربلا

جانبِ کربلا کاش! عطارؔ کا چل پڑے قافِلہ، یاشہِ کربلا