Khair ul Bashar Par Lakhon Salaam

خیر البشر ﷺ پر لاکھوں سلام لاکھوں درود اور لاکھوں سلام

روزِ ازل جو چمکا تھا نور محشر میں ہوگا اس کا ظہور

اول سے آخر ان ہی کا نام خیرالبشر ﷺ پر لاکھوں سلام

جن وملائک تیرے غلام سب سے سوا ہے تیرا مقام

یاسین و طہٰ تیرے ہی نام خیر البشر ﷺ پر لاکھوں سلام

جود و سخا کا پرچم تو ہی زخم جہاں کا مرہم تو ہی

مشکل کشائی تیرا ہی کام خیر البشرﷺ پر لاکھوں سلام

عرش بریں تک چرچا تیرا شمس و قمر ہیں صدقہ تیرا

اے ماہ کامل حسنِ تمام خیر البشرﷺ پر لاکھوں سلام

اے جانِ جاناں جانِ جہاں ﷺ شاداں کہ تم ہو شاہِ شہاں ﷺ

نازاں کہ ہم ہیں ادنیٰ غلام خیر البشر ﷺ پر لاکھوں سلام

سب کو میسر ہو یہ مقام پہنچیں مدینے بن کر غلام

پڑھتے درود پڑھتے سلام خیر البشر ﷺ پر لاکھوں سلام

تیری ثناء ہے میرا نصیب قربان تم پر ہو جانِ ادیب

تم پر تصدیق عالم تمام خیر البشر ﷺ پر لاکھوں سلام