Mar Ke Apni Hi Adaun

مر کے اپنی ہی اداؤں پہ امر ہو جاؤں اُن کی دہلیز کے قابل مَیں اگر ہو جاؤں

اُن کی راہوں پہ مجھے اتنا چلانا یارب کہ سفر کرتے ہوئے گردِ سفر ہو جاؤں

زندگی نے تو سمندر میں مجھے پھینک دِیا اپنی مُٹّھی میں وہ لے لیں تو گُہر ہو جاؤں

میرا محبوب ہے ، و ہ راہبرِ کون و مکاں جس کی آہٹ بھی مَیں سُن لُوں تو خضر ہو جاؤ ں

اِس قدر عشقِ نبی ہو کہ مِٹا دُوں خود کو اِس قدر خوفِ خدا ہو کہ نڈر ہو جاؤں

ضرب دوں خود کو جو اُن سے تو لگوں لا تعداد وُہ جو مُجھ میں سے نِکل جائیں ، صِفر ہو جاؤں

آرزو اب تو مظفؔر جو کوئی ہے تو یہ ہے جتنا باقی ہُوں ، مدینے میں بسر ہو جاؤں