Allah Ki Rehmat Se Phir

اللہ کی رَحمت سے پھر عزمِ مدینہ ہے پھر عزمِ مدینہ ہے تیّار سفینہ ہے

چند اَشک، نَدامت کے ہے زادِ سفر میرا پَلّے میں عِبادت کا کوئی نہ خزینہ ہے

گو راہِ مدینہ پر میں چل تو پڑا ہوں پَر افسوس سلیقہ ہے کوئی نہ قرینہ ہے

صدقے میں محمد کے دے بخش اُسے یارب مجرِم ہے جو عاصی ہے بدکار و کمینہ ہے

اے نُورِ خُدا آکر چمکادو پئے مرشِد سرکار مِرے دِل کا بے نُور نگینہ ہے

جسمانی مریضوں کو اللہ شِفا دیدے اچھّا ہے فَقَط وہ جو بیمارِ مدینہ ہے

Why Screenshot When You Can Download? Get the App for Efficient Storage!

تم جانتے ہو کیا ہے یہ دعوتِ اسلامی فیضانِ مدینہ ہے فیضانِ مدینہ ہے

سرکار کی سُنَّت کی تبلیغ کئے جاؤ جام آپ کے ہاتھوں سے گر حَشر میں پینا ہے

ہر دم مِرے ہونٹوں پر بس ذِکرِمدینہ ہو یہ میری تمنّا اے سلطانِ مدینہ ہے

عُشّاق تڑپتے ہیں یادِ شہِ بَطْحَا میں آتا یہ جہاں میں جب بھی حج کا مہینا ہے

محبوب کا مستانہ سرکار کا دیوانہ دل اس کا مدینہ ہے سینہ بھی مدینہ ہے

غم میٹھے مدینے کا اے کاش! کہ مل جائے ارمان یِہی دِل میں اے شاہِ مدینہ ہے

تُو کر دے عطا مجھ کوروتی ہوئی آنکھیں اور غم میں ترے آقا جو جلتا ہوا سینہ ہے

افسوس مَرَض بڑھتا جاتا ہے گناہوں کا دے دیجے شِفا عَرض اے سرکارِ مدینہ ہے

دُنیا کا گلستاں کیا جنت کی مہک سے بھی خوشبو میں کہیں بڑھ کر آقاکا پسینہ ہے

روتا ہوا پہنچا تھا روتا ہوا لَوٹا تھا ہیں وَصل کی دو گھڑیاں پھر ہجرِ مدینہ ہے

دولت کی فِراوانی ہے مانگنا نادانی بس اَصل میں دولت تو اُلفت کا خزینہ ہے

عشّاق کی نظروں میں ویران گلستاں ہیں دل ان کا تو شیدائے صَحرائے مدینہ ہے

عطّار کو گر تُو بھی ٹھکرا دے کہاں جائے تیرا ہے یہ تیرا ہے گو لاکھ کمینہ ہے